深井行山美食團 - 發記 + 裕記

上週日，太公同班舊書友齊齊由荃威出發，行山路去深井。

我地呢班非常之唔專業的人士，行左三個半鐘先到深井；關於行山當中的爆粗、傷人、甚至企圖殺人等事件，我遲d先講。民以食為天，講左食先。

我地首先去左發記....點解去食糖水先呢？因為行到落山先得果四點半鬆d, 食燒鵝又太早，唯有去發記食陣糖水先。

嘩....一入到發記就好勁榴槤味，空氣入面d榴槤味含量極高！如果你好鐘意食榴槤，呢度有如天堂；之但係你唔鐘意的話....透少兩啖氣把啦！ (果個咪我囉，唉~~~)

一人叫左一碗糖水，再叫多個酥皮焗香蕉share。


酥皮焗香蕉....OK啦。

呢個楊枝甘露好味....入面d芒果好味...


其實發記d糖水做得幾好，用既生果又好新鮮；我叫的楊枝甘露，個味又"較"得剛好，入面d芒果都好好味呀~~

謝麗好豪氣咁叫左個什果榴槤布甸好味, 係生果面，然後有個疑似榴槤布甸的物體，重點係入面包住左件大榴槤...好闊太feel, 佢食得好滋味。


幾震撼...

成團六個人，有一半人都叫左榴槤野食，我右手邊既肥溫同連華都叫左個咩榴槤xyz飄香....我只要對住佢地，都會聞到好勁榴槤味！我唯有轉向左手邊，同bear兩個瑟縮一二角食我自己碗野，好坎坷呀....><

************************************************************************

食完糖水，擾攘下，我地緩慢地移動到裕記，到裕記時都差唔多六點。

裕記好串，要你齊人先入得；我地去到時，己經開始有人要等啦。不過我地好好彩，人齊之時剛好有六人枱係吉既.....嘿嘿...(再遲d黎就要等啦...><) 一坐低，BEAR就好堅持要一隻鵝。雖然大家都好懷疑會唔會食得晒，想叫住半隻的；但既然呢同學咁堅持，話會係armarm好，就叫啦...點知..... 結果上左兩大碟黎 (半隻一碟)，搞到我地好似成世未食過燒鵝咁呀.....
睇呢張就知幾震撼啦...好似出獄餐咁呀....

好啦，隻燒鵝係算ok既，皮幾脆，不過好肥1or，有幾舊鵝仲有大塊肥膏tim！見到都唔多開胃；個肉質一般，唔夠鮮味...即係, 真係試少少好啦，我地為左要盡量唔好浪費先食得多....唉。我覺得鏞記果d好食d, 冇咁肥，肉又鮮味d, 同埋都唔係貴好多。


肥鵝！

我地仲叫左百花炸蝦丸、西湖牛肉羹、蒸帶子豆腐、西蘭花炒鮮魷...佢d餸幾好味，樣樣都整得唔錯，料幾足，不過貴左d，唔係咁抵食。


呢碟百花炸蝦丸得果十粒...都幾廿蚊架

班友仔仲叫左個唔知咩"豉油xyz鵝腸"的，我唔食內臟，冇食到，據聞幾爽喎咁lor.

食完出門，成村人o係度排晒隊等位....使唔使呀？裕記雖然野食算係唔錯，但唔係值得你痴痴地等半粒鐘，甚至一粒鐘然後走入去食果d lor....

************************************************************************

行山札記：

1. 有一爆粗書友因為上山果段太多樓梯，行到佢索晒氣，所以一路上爆左幾次粗。仲有，行到山中的一個涼亭，發現只係行左一小半時，大爆左一次：


望望下幅地圖....X街~~~！！乜仲有咁長架？！ (注意佢隔離個侍婢係唔敢幫鏡頭架！)

2. 好在，爆粗書友帶埋佢個近身侍婢黎 (即係佢男友)，照顧下佢，唔係可能俾我地四條友合力踢左落山。

3. 後來，爆粗書友拾得粗樹枝一條作行山竹用；不過後來將佢當武器，稍有一言不合，就攻擊佢個近身侍婢，好彩冇殃及池魚

4. 爆粗書友得悉某同行者急尿後，經常發出 "噓~~~噓~~~"之聲，極盡挑釁之能事。(都話我地好想踢佢落山架啦...)

5. 行到一半時，爆粗書友突然問其侍婢：「點解你仲未死下死下咁既？」未及其侍婢回應，太公搭咀：「呢度好似得你一個行到死下死下咁喎！ 」爭d俾人殺左。 (可以執返條命仔響度寫呢篇野，真係恩典)

6. 其實個view幾靚的，不過可惜天氣唔太好，陽光不足，映d相就爭d。

7. 太公因為畏高，部份路段行到腳軟，多得肥溫肯企係太公側邊檔住大部份山下的視線 (成圑人最effective果個係佢，嘿嘿)，特此致謝。

8. 同埋多謝連華做我地呢班奇怪雜兵的領隊同設計路線，阿門！