太公廚房 - 懶人煮花雕醉蛋大法

醉蛋睇落好似好勁，但其實係好易整架...用我呢個懶人煮法

材料:
雞蛋X隻 (你想食幾多咪幾多囉)
花雕一大樽 (你買定一大樽, 用唔晒吹晒佢都好)
雞湯適量 (屋企有雞粉就用雞粉開, 冇雞粉, 我估生抽都得 XD)
杞子幾粒, 菊花幾粒 (扮冇咁HEA, 好似好勁咁之用)

做法:
1. 首先煮蛋, 溏心蛋, 煲滾煲水, 放蛋(放果下我係熄一熄火的, 費時佢爆) 入去煮3分鐘, 熄火再蓋蓋焗2分半-3分 (因為我求其用個湯殼攞佢地出黎, 要兩個兩個咁拎, 咁我2分半就開始撈蛋, 3分鐘時撈晒~!!!); 撈出黎後, 浸落凍水, 過一陣剝殼. (要小心, 好似我咁粗魯就挺剝爛晒d蛋~!)

2. 煲水時可以煮埋個湯, 好簡單, 將雞粉開水, 加埋d杞子同菊花一齊煮, 煮滾就可以了, 試下味, 唔太咸唔太淡就ok; 攤凍.

3. 凍咗之後就可加入花雕, 製成醉蛋汁; 我鐘意花雕d味, 所以落得較多, 湯同花雕的比例係1:2; 怕酒味太重的話, 個比例可較至1:1

4. 將d蛋浸落d醉蛋汁度. (要蓋過晒啊~), 浸佢至少24小時, 大功告成~!!! (放心, 大把人食過, 食唔死人)


*其實同樣方法, 用嚟浸雞翼都得. 不過雞翼記得落滾水煮熟, 熟咗之後放落冰水浸, 咁個皮先會好味

太公廚房 - 西班牙奄列 (la tortilla de las patatas)

全因讀書時首次到西班牙遊玩時，一試愛上這個tortilla，加上回程在飛機上看到食譜，當時又身在無聊又無啖好食的愛丁堡...也順理成章鑽研起這味來。

因為全家唯一一個易潔鑊就係個方型煎蛋鑊，所　

用具:
- 唔好太大個的煎pan一個
- 可以覆蓋到煎pan的大碟一個

材料:
蛋: 4-6隻 (視乎剪PAN大小)
洋葱:　一隻，切粒
薯仔: 大size的話一隻, 切薄片
*煮此味, 最好以橄欖油製作.

做法:
1. 將蛋打勻, 加鹽調味, 以大碗盛之
2. 煎香洋葱, 放入切片薯仔, 加少少水, 閂蓋焗約5分鐘至薯仔略熟, 然後煮至收乾水; 然後倒出, 放涼後加入蛋內 (蛋要蓋過材料; 通常洗完鑊, check返個email後, 材料都涼涼地了)
3. 洗鑊; 再次燒紅個pan, 加約三湯匙olive oil; 以鑊鏟潑弄, 使成個煎pan每一次都有油
4. 轉慢火, 倒入蛋+薯仔混合物入煎pan內, 慢火煎, 到邊皮都凝固 (約5mins), 先鏟一鏟底確保冇痴, 再以大碟蓋之, 倒轉煎pan, 將奄列倒出.
5. 平放個奄列入返煎pan (如有需要可先放d油), 慢火煎另一邊; 約5分鐘後上碟, 大功告成~!!

太公廚房 - 隨心煎日式蛋捲

左邊是甜蛋，右邊有黑色柴菜的是加了紫菜和櫻花蝦

其實學會日式煎蛋捲已有好一段時間了 - 當初想到學，還是「迫上梁山」 - 事關當天人在蘇格蘭，好吃的中菜館也欠奉，味道尚可的日本菜更是難求；所以，唯有上網找食譜，自己在宿舍試煮。就是這樣，學會煎蛋捲。


我一向煎蛋捲都比較隨意；要煎一條較完整較美觀的蛋捲，最好用上三隻蛋；不過我有時也會只用一或兩隻，調味也下少一點；不過話說回來，我調味，本來也下得相信隨意。

以下就是以最基本三隻蛋的蛋捲食譜，供大家參考。

材料：
- 雞蛋  三隻
- 三倍濃縮冷麵醬油   約1-2湯匙**
- (如果煎甜蛋) 白砂糖 1-2包
- (如果煎咸) 基本上不需要再調味，可隨心下紫菜、白飯魚、櫻花蝦、芝麻等。
**原本食譜是要加味淋和日式醬油，還有一些鰹魚汁，但一支冷麵汁基本上有齊所需之味，唔使搞到咁複雜

此萬能冷麵汁吉之島living plaza有售，12蚊支，煮不少日本餸都靠佢

基本上，將所有材料混合就可。但攪時不能以平常發蛋的方式發，最好從一個方向 (即順時針或逆時針)，慢慢攪拌至所有材料以及蛋黃蛋白混合為止，這樣可減少蛋漿起泡，煎出來會美觀得多。

然後，落鑊。

最好是有個方型煎蛋鑊，沒有也可，只是中間部份會比兩邊厚一點而已，吃味還可以的。然後，加上筷子一雙，小鍋鏟一個。

下油；油最好均勻地抺至鑊的每一個部份，邊位也最好有少少；油熱後下蛋漿，大約是全部蛋漿的三份一至四分一，均勻佈滿全鑊後，會是偏薄而不太厚的一層；待蛋皮約七成熟 (即大約只餘面還有些少蛋漿浮動，用筷子夾起一端，不可手震 (可用鑊鏟輔助)，手震蛋皮易穿；輕輕往中間摺起約1cm，再慢慢捲至另一端。

將蛋捲移至剛開始的一端，再下一層蛋漿，重複以上步驟，不過今次有對上一次已捲好的蛋捲為軸心，慢慢捲；到最後一層記得收口位稍為多煎一回，收口才會靚。

深夜食堂中剛煎好的蛋捲會置於一方型木盒內成型；平常人家沒有此物，也可用保鮮紙或壽司用的竹簾捲好放涼使其更堅實一點。我用的是保鮮紙。

放涼後再切，大小隨意，我一向不太規則的。

調味基本上很簡單，只是想煎得美觀，還得要熟能生巧。