如果有更「平和」的方法令政府聽市民意見，使鬼走出嚟公民抗命咩

咁，各位仲係覺得，香港人「好唔冷靜」、「搞亂香港」、「有咩談判桌上解決」、「尐政棍唔好再利用學生」、「警察都有阿媽生」的朋友，真係諗清楚其實呢幾年，直到近呢一年幾個月，香港人以及學生為爭取普選做過乜？

1. 談判 - 市民同學生都好想有得發聲、都好想有得談判；一直以來，我地發表意見，相信唔少人 (如我) 都有響政改諮詢期時發表我要冇篩選普選的睇法；仲搞埋個公投，好平和好和理非非喇卦？但我地講咗咁多，結果都中央提出只能有提委會篩選候選人的方案，當我地一直講的冇到!

再者；大早係學生話要傾，689唔理佢地，而家係邊個迫到市民上街先？責任係咪響政府度先？

2. 「政棍」 - 係囉，你地所謂最討厭的所謂「政棍」們 - 咁，即係我都唔係特別鐘意佢地，但之前李飛又只係見佢地唔見市民唔見學生，如果佢地代表唔到市民意見，咁係咪政府官員應該走入人群同民眾對話先? Again，責任又係政府囉。(雖然，其實今次俾人拉先果批都包括你地所講的「政棍」....OOPS, 定係我誤會咗，其實你係講既政棍譚耀宗同葉劉？喂，我好同意呀...呀都係唔係，我覺得話呢尐無恥之徒係「政棍」都侮辱咗支棍呀陰功)

3. 亂？ - 我地市民上街係為咗爭取更好的未來，唔係要搞亂，呢個係公民抗命；造成一時的不便我感到抱歉，但一個有普選而並非被愚弄的未來，你我都可享有，你都有份架。

係的，我相信大部份市民都嬲了 - 因為我地和理非非地爭取普選咁耐都俾人當耳邊風，近月仲不斷被親中人士以及官員用不同歪理嚟迫我地收貨 - 嘩喂，唔止係冇真普選，簡直侮辱我地智慧，豈能不嬲？更何況，大家犧牲休息時間同假期走出嚟呀，你估貪好玩

4. 傳媒唔好「煽動」？ - 我諗唔同傳媒有不同取態，選擇佢地覺得應發揮的社會功能；既然係報導真相，我個人覺得有咩問題；不過報格同取態的喜好係好主觀既，你唔鐘意我都了解；不過有少少好奇點解某尐傳媒的報導遠偏離真相，以及滿佈歪理侮辱市民智慧時，又唔覺你叫佢地做返好本份啟迪民智？

5. 「警察都有阿媽生」 - 我絕對同意，所以我都不太鼓勵向住個別警察作人身攻擊；然而，警察係一個紀律部隊，一個整體，今次警察無端向手無寸鐵的市民施放催淚彈，真係好有問題；作為一個整體咁去批評警察唔係唔得呀嘛？即係，如果咁都唔得，下次咩x佳呀大x樂呀美x呀麥x勞呀有咩問題食品果尐你都唔好鬧喇 - 「人地員工都有阿媽生」架嘛，用你個邏輯！

仲有，你梗係唔知有示威者都有送水俾警察俾佢地補水，只係佢地唔要之嘛 - 喂，有邊個冇當警察冇阿媽生先？！

6. 你可能覺得香港好亂，仲係唔多明點解要搞到咁「激」？但你試下調返轉諗，其實咁就突顯真普選的重要性 - 唯有政府係真正由人民授權選出嚟的，先有民意基礎去做嘢 - 佢為咗張選票，都不得不聽市民意見，大大減低搞到市民「無路可行」，走出嚟抗命的機會。即係我哋今次上街爭取到，我地以後(可望)唔使咁辛苦喇，分分鐘七一都唔使再遊行有返日假你話幾咁美好呢？