東京屎塔 -- 我的老豆老母

(呢篇係純屬玩野自娛之作，如果閣下睇完被吹到"啤"一聲，非本人所能負責)


我老豆響我細細個果時，已經離開左屋企，自小，我就同我老母相依為命。

雖然家境清貧，但我老母仍然好努力不懈咁，靠佢一雙手倒夜香黎供我讀上大學。

大學畢業之後，我就出左東京做野。

聽我老母講，我老豆係做建築工程，全東京既屎塔，佢都有份起的。所以，老母一直都有個心願，就係黎東京睇屎塔。

不過，我實在有太多野做。莫講話接老母黎睇屎塔，就算每次用屎塔，我都係匆匆用完就走，望都唔望多一眼。

就連老母，我都好少返去探佢...

終於，我返鄉下探佢。呢幾年雖然我都會寄錢俾佢，但佢怕我會洗腳唔抺腳，唯有繼續倒夜香；之不過，由於鄉下d屎塔愈起愈多，老母佢漸漸開工不足，被迫收山。

我一落火車，就見到老母落寞的身影；佢身上已經冇左果陣臭味，但個人反而變得憔悴。係老左，老母佢老左好多。唔知仲有幾耐命呢？我忽然好後悔，之前冇好好珍惜同佢相聚既日子，冇帶佢好好地去睇下東京d屎塔。

終於，我的起心肝，接左老母去東京住，仲請左一個月假，陪佢去睇東京既屎塔。雖然理論上，每個地方既屎塔設計係大同小異，但東京屎塔對老母黎講，似乎有一種更深層的意義....

有一日，我講俾老母知，東京有好多屎塔都開始老化，要重新裝過；我新接左個project, 就係要翻新東京d屎塔。

老母好開心，佢覺得，自己個仔能夠繼續從事同屎塔有關既工作，仲要嚮東京做，實在令佢感到非常驕傲；佢緊緊地捉住我隻手...

果一刻，我估都估唔到果次係佢最後一次捉住我隻手。第二朝起身，叫極老母都唔醒，我就發現佢冇左呼吸。

我默默地為老母處理左佢既後事，然後再默默地整理佢既遺物。整理期間，我發現我老母原來收埋左各種不同既屎塔模型，仲有好多我細細個去屎塔時的相....

我望住d模型同相，鼻子一酸，忍唔住喊左出黎。老母，我答應你，我一定會起好d屎塔，我唔可以辜負你對我既期望。





創作靈感：來自剛睇完《東京鐵塔》dvd的一位世紀大醜男