舊文重貼: 打小人與打大人

9年後的太公按: 2003年，正值建華之亂顛峰之時，當日於鵝頸橋下遊走，只覺特別多人，回家後方發覺，原來不少人都是故意去打董建華和梁錦松小人的....

今天，特地舊文重貼；驚蟄將之，今年去打曾蔭權小人的人，會否如斯噓冚？

打小人與打大人

日期：6/3/2003 (四)

二零零三年三月六日，天陰，但心感萬分雀躍興奮。

  

去年因為相機臨時機件故障而被迫眼光光睇人打小人的我，不服氣了一整年，今日終於可以吐氣揚眉一番。

到 達鵝頸橋時於五時四十五分，第一個感覺是：嘩，使唔使咁多人！。鵝頸橋於放工時間一向多人路過，尤其是其三角安全島地帶。今日更加多；由於係驚蟄加上有毛 毛雨關係，將大部份前來打小人的人擠進那三角地帶。於是，除了路人之外，更有很多排隊打小人，打緊小人，同打完小人的人。

據現場有關報道(即係我報返俾自己聽)：人多，好有氣勢。而咁多人之中就大部份都係女性，老中青皆有之。而男人都有，但就以阿叔為主。

而擺擋既，就真係清一式以阿婆為主。好多阿婆，花多眼亂；更加打破左所謂既年齡主義：老人家唔係唔productive, 仲好professional，只係平時個社會俾唔到佢地做到professional 既空間；而今日班阿婆仲係度搵到佢地既空間。我大喜之下，於是攞左部相機出黎gum gum gum…

當我攞住部相機gum gum gum 之際(其實都gum左好耐，因為心情過度興奮雀躍而手震震…)，奇怪既事就發生左：開始有人向我指指點點。我開始狐疑：yee, 係我沉魚落雁；抑或係，挾著青年議員之名上過下報紙電視既我，俾人認出呢？開心緊之際，有個幫手睇擋既阿婆行埋黎同我講：‘你係影就快手D，如果唔係嚇走我D客我唔俾你影架’。唓！ 

俾人話我阻街之後，我落荒而逃，逃到去側邊較少人的街上再戰。

  

冇咁迫，冇咁多人，冇咁多煙，企多陣都唔會俾人話阻街…我終於企定定睇返之街影既相，竟然有重大發現！！！！！：

點解有咁多老虎既？

  

為左發揚我自己好尋根究底既精神(其實係八卦)，我決定，我決定，去打小人！！！

其實我為人平實，又靚，又好人，又冇仇口，又和藹可親，又美若天仙…(下刪一萬字)，要搵仇家去打真係好難。連打梁錦松，都怕唔覺意打死左佢攪到佢個女變左孤兒仔…於是，我厚住面皮問個拉客阿姑：‘呃…我冇仇家，咁可唔可以打小人架？’‘得！你冇仇家啫！但人人身邊都有好多小人架ma！打小人祈福呀ma!!!’於是，我就決定：打呀！！！！

於 是個阿姑俾左張紙我叫我寫低自己個名。寫完之後，個阿姑就幫我俾左個阿婆。我見住個阿婆係度咬左舊肉，然後攞小人紙抹下條繩同寫有我個名既果張紙。過程中 係不斷口噏噏。然後攞出張小人紙，係咁打，一路口噏噏；打到個小人一棟都冇之後，將所有野用紅紙包住，掃下老虎個背‘隻’，拜兩拜，再掃下我。然後大叫一 句：‘好咯！’。打完。

跟住就俾左堆野俾個阿叔攞去燒。阿叔熱心地解釋話，燒呢下係將我D衰氣燒晒。而驚蟄又係所有冬眠既動物醒返之時，D動物最兇猛，所以今日打係最好既，云云。

後記：

由於呢一個打小人過程極為珍貴，我係全程錄低左以作日後教學用途；(教自己點樣打小人)而個阿婆亦真係非常專業，全程我有我影，佢有佢打，完全冇尷尬，亦唔嫌三嫌四，絕無欺場。仲有，佢地係一D都 唔喉擒咁叫你俾紙。除左問佢價時佢講過話收錢之外，成程前後，就算係完左之後，都冇人同我講話俾錢。係我自己走時俾錢佢，佢仲講左佢：‘下，唔使咁急 既！’。一切都講個信字；今時今日咁既服務態度邊度搵，係完全打破晒我地‘慌死你唔俾錢’既消費模式。一個看似迷信既打小人儀式，一班看似老弱既打小人阿 婆，其實係不斷挑戰緊我地社會既制度(現存係香港個購物制度係咪好著重security, 慌死你唔俾錢呢？)及各種主義(年齡主義 – 邊個話老人家冇生產力，邊個話老人家唔係professional!!)，令到我地作出反思。我今次真係心服口服乜都服。係呢度，我要向各位阿婆致敬：阿婆萬歲！！！



文章原址:
 http://www.zorpia.com/cyjoyce/journal/871316 (如果你地開到zorpia的話...)