傾國傾城美女厨房

相信太媽媽一定曾經疑惑過一段時間 -- 到底自己當初生果個係仔定女呢？因為太公雖為一位國色天香芳華絕代之女子 (邊個敢嘔？！同我捉佢去勞改！)，但所有一般認為是男仔才會做的事做盡：同男同學結黨欺凌弱小兼一齊講大話，同男仔打交，讀maths group (AL Applied mathes + Pure Maths + Physics 果隻喎)， 一個人去旅行，報考機師....家下仲話要去學楂貨van，嚇死太媽媽。(好彩有肥羅莽，唔係太媽媽可能會以為個女係TB)

不過，一切疑惑都係今日解開晒；太公今日用左兩個鐘，整左呢幾日過年食用既蛋~餃~！



係咪個個都好靚呢。蛋餃係上海人既過年食物的一種；以蛋皮包豬肉 -- 可以講係一個小型奄列咁啦；整完一個個黃gumgum，好似金元寶咁；你食晒d金元寶，新既一年就會發過豬頭，金銀滿屋。


點整呢？


所需工具：

金屬湯殼一個，
有火既煮食爐一個
筷子兩雙；其中一雙最好尖頭
湯匙乙個
茶匙乙個
其他碗碗碟碟自己黎


材料：(約整到15-20個)

約$5免治豬肉

3隻雞蛋

少少油

salt, 麻油，生粉，燒酒適量。



做法：

1. 豬肉先以salt, 麻油、燒酒及生粉醃好，備用。

2. 將3隻蛋發好，備用

3. 預備製作：將湯匙放在蛋裏；尖頭筷放於就手位，另一雙放於豬肉內；以碗裝少少油，放隻茶匙落去備用；以上全部放爐邊就手位。

4. 如果你是右優，就左手楂湯殼；先開大少少火，放湯殼在上(貼住都得架啦)將之燒熱，然後轉小火。

5. 落約1/3茶匙油於湯殼，然後轉湯殼，整隻湯殼都沾到油；

6. make sure油要熱；然後放約4/5湯匙蛋漿落湯殼；轉圈以形成一張小圓蛋皮

7. 放豬肉；初整時，可先放約一毫子大小份量的豬肉 於右半圓的中央(易包d)；做順了可因應情況及需要多放一些。

8. 以尖頭筷子拿起左半圓之蛋皮，對摺覆蓋於右半圓上；這動作要快及不要手震，手震蛋皮會穿。

9. 以陰力輕輕按蛋餃之豬肉"函"位置，再慢慢按週邊使蛋皮合上

10. 夾起蛋餃，反轉再煎一會，一個就完成了




注意：

1. 頭幾隻會最難搞，因為好多時未燒熱個湯殼就去馬，所以記得俾d耐性，等佢熱左先

2. 落完蛋漿即刻返番個火度再轉，唔係根本唔夠熱結唔到蛋皮；同埋記得保持均速以使蛋皮厚薄均勻

3. 如果見湯殼尚油亮，可以不用次次落油。

4. 如果你好似太公一家儲糧咁整定幾日食用，或者你想當蒸餃食，可以將整完既蛋餃隔水蒸約15分鐘，等裏面既豬肉熟透，放雪櫃都可以放倒幾日。另外可以放湯食，如果即日食的話，就可以唔洗蒸直接放落湯煮就得。



well, 太公其實係個入得厨房，出得機場既一位沉魚落雁美少女黎架，呵~~~~