天壇大佛大戰昂坪360

Round 1

話說昂坪360初啟用時，因為影響氣流，繼而影響天壇大佛日常閉氣作息，於是天壇大佛難以壓抑心中的怒火，一於要同昂坪360黎返場大戰咁話。

大佛：你個邪魔外道，我今日要了結你呢個妖孽！大~佛~朝~宗~!!!!我妻！

360: (慒炳)下....好驚呀, 好驚呀....(驚到停左)

大佛：(驚)下，呢d後生仔咁唔襟嚇既？我都未射中佢，佢自己停左？
(大佛放下原本準備出大佛朝宗的手；但因為手風太勁，唔覺意撞到昂坪360隻燒豬移位)

昂坪360經此一嚇, 嚇到精神錯亂，會間歇性呆滯停鬼左；好在後來有關徵狀得以緩和。

Round 2

上回講到大佛打算出手攻擊昂坪360，點知手都未出，360已經嚇到停左，精神仲錯亂埋。為怕俾人話佢欺凌弱小，大佛決定忍，由得個360 自己轉黎轉去，最多得閒當佢傻仔笑下佢。直至有一晚....

360: 阿大佛叔....

大佛：咩事？無聊野咪問下，自己上網查，唔好阻我打坐呀下！

360: 我......我覺得我身痕！

大佛：下！你身痕？你身痕關我咩事呢？你身痕咪搵人刷下背lor...

360: 我....我唔知搵邊個呀....

大佛：氣！俾你激死！人少少，我當積返d陰德，幫你R啦。你邊度痕呀？

360: 呢卡車箱頂咯。 (手指某車箱頂與電纜連接處)

大佛：嗱，你唔好郁呀下...

(大佛正欲伸隻手埋去"r" 360個車卡頂，豈料，個車卡突然成卡跌左落黎！)

大佛：下...我仲未"店"到喎....唔關我事架, I'm nobody's child....

360: 我....我....身體某部分...甩左！我甩左身體某部分呀！救命呀~~~~! (說罷即暈！)

大佛：喂，你唔好暈住呀，喂~~~~!


(事件往後之發展，相信大家看新聞都已經略知一二；事後360雖然間中有醒返，但見到自己身體果部份仲未駁返，即時又暈過。而係經年累月既取笑中同360建立左微妙感情既大佛呢，就更加唏噓....)

遊大佛善信A: 喂, 你知唔知呢, 原來360跌左卡車卡呢，係因為開幕時個燒豬放錯左位呀！

善信b: 咁大鑊！燒豬放錯位，真係可大可小架！

善信A：係呀！今次都係跌左卡車卡姐，下次可能會成個爆tim呀！


以上對話，大佛聽在耳裏，很不是味兒:

大佛：死啦..佢開幕果日，係我唔覺意郁到佢隻燒豬果喎，佢而家冇左一忽，唔通真係因為.....哎....我應該點算呢？點算呀....


自此，大佛陷於深深的自責當中，不能自拔，最後更決定扮「預備回歸」，閉關為360唸經上香，希望可以救返佢一命。


欲知後事如何，請看下回分解