太公捉姦

「小姐，幫我填份問卷啦？」係香港，如果一個人行街，遇到這句話既機會率一定高過惠康搵笨計多你錢。

這些人一則保險，二則美容纖體；前者繼有一次被騙上車，然後向其吹足整整半小時Risk Management理論(因為近得班精算佬多)興實踐，兼力證佢個plan 一d都唔扺之後，以後都唔會想再碰。

但後者就好玩。如果得閒，不妨當做下善事，等佢地唔好下下都俾人reject咁慘 -- 雖然做著個咁既受訪者，唔知好定唔好彩。


繼上次個被我激到無言既阿叔之後，今日又黎個阿姐。

姐；小姐，幫我填份問卷啦？

太：好。

(一輪性別年齡等基本資料，略)

姐：咁小姐你對你自己既身型有d咩想改善既地方呢？你可以係度揀 (包括瘦腿，收身，豐胸等choice)

太：(坐擁34-28-37 標準身形的我決斷地說)冇！

姐：(打量)小姐...即係你有冇諗過減肥呀咁既？

太：(冷靜兼有權威地)嗯，你而家係叫我幫你做問卷呀ma？我咪講俾你聽我既意見lor? 你唔係收集意見咩？你咁做問卷好唔scientific喎....

姐：(無言).....咁我地做埋佢啦....嗯....咁以下有咁多選擇啦 (叫我睇張紙，入面有暗瘡、多油、多油脂粒等皮膚問題)，咁你揀你覺得你既皮膚有既問題呀？

太：(扮諗，註太公呢期谷緊m, 勁多油脂粒, 仲有d瘡)冇喎

姐：(太驚)下...小姐你d油脂粒都幾勁咁喎....

太：(大大聲，慌死冇人知) 咁你係問我意見呀ma，係咪？咁我覺得冇咪冇lor? 你係咪真係做問卷架？你咁多意見你唔使咁辛苦企係度搵人做問卷啦？你返公司自己填晒得lor, 係咪？


其實呢d係一d美容纖體公司既人，假借做問卷為名，等你講出你想要改善既皮膚同身形問之後，跟住就捉住你唔放，勁sell你。又係有排講先走得甩果隻，仲要意志力低d都會破財。呢ｄ宣傳手法認真賤格，最慘既係通常用得呢ｄ手法sell既貨品同service好極有限 -- 唉。而且，咁會令到市民大眾將"問卷"同"宣傳"等化，然後，認真係問卷調查的人員工作就會更有難度。這種宣傳手法，實在是強姦了統計科學~~ 嘩喂，咁我咪捉緊姦？！呵呵~~~